喺香港爭紥根多年嘅Aeon(前稱吉之島)，近年同新地(016)旗下嘅一田百貨鬥得難分難解，但相信由於缺乏地產商撐腰，分店越嚟越少。反觀一田靠住母公司係香港座擁大量商場優勢，不斷攞到Aeon嘅靚位開店，好似喺大埔超級城嘅Aeon，一Ｏ年換咗一田、荃灣廣場嘅Aeon喺一一年亦都變左做一田，搬去對面馬路嘅灣景廣場、最近觀塘apm商場嘅Aeon亦都執笠，新嘅一田今個月就會開張。計落一田會有七間分店，規模直迫有九間分店嘅Aeon。
雖然一田策略係喺Aeon舊有鋪位開百貨公司，想接收習慣咗舊Aeon百貨消費模式嘅客源，不過心水清嘅消費者當然會格價啦，喺baby kingdom論壇就有大批師奶留言，感慨大埔超級城由Aeon換咗一田後啲嘢賣貴晒。
我地落區實地視察，去到荃灣區相隔只係一條路、打對台嘅一田同Aeon格價，以相同貨作比較，發現一田貨品的確貴過Aeon一成至三成二。例如759阿信屋有得賣嘅森永CHOICE餅乾，Aeon只係賣$16.5，但一田就要$21.9，足足貴三成二！北海道牛奶Aeon賣$21.5，一田就要$25.9，另外如熱浪薯片、haagen dazs雪糕，一田都分別貴過Aeon一成四同一成。
顧客黃小姐認為超市方面，一田較Aeon貴，自己經常幫襯Aeon，但如果喜歡買高質素食品的人，就會喜歡一田。曾先生則認為有競爭才有進步，所以希望一田多開分店，但認為一田貨品價錢略貴。