759阿信屋繼零食同化妝品後，準備連玩具都賣埋。759阿信即將會喺上水彩園廣場，開間叫《759 Toysland》嘅臨時賣場。
從相片睇，貨架上有Thomas火車頭同反斗車王McQueen等玩具，同一般玩具舖大同小異，但係阿信屋就連嬰兒紙尿片都有得賣，仲要係日本同韓國牌子都有齊。有網民話期待開業，有多一個選擇，但亦有人批評，阿信屋啲貨來來去去都係嗰幾款，冇咩新意；有人甚至建議下次開臨時759成人玩具店，唔知講真定講笑。
到底間舖點解要開喺上水？阿信屋下個目標諗住開舖賣咩？費清噚日就嘗試打電話搵759阿信屋創辦人林偉駿問清楚，可惜聯絡唔上。林偉駿上年就向傳媒透露過，想喺九龍城開玩具店，賣日本同國際品牌玩具。《759 Kawaiiland》沙浦道分店係有兼賣玩具，但就阿信屋網頁睇，上水呢間睇嚟真係第一間真真正正嘅759玩具店。