759下個月便踏入第六年，一如以往阿信屋都會做大優惠，「每年都係啦，緊係要癲下！」CEO林偉駿說大日子一定要慶祝。
雖然話要癲下，不過林偉駿話始終有底線，唔會做到盡，記者替各《壹仔》讀者追問到底有幾多折，「唔會做到半價啦！六折已經冇水位，除非生意爆到痴左線啦！同埋減咁多，即係我平日呃鬼人啦！」
上年五週年一連兩日做六折，今年卻未必會做。雖說最盡六折，但林偉駿暫時未定案是否做六折，因為超抵折扣後，生意會大受影響，「顧客買到盡，之後個十日、八日，生意會好慘淡。」加上日圓升值因素影響，林偉駿都要諗過度過。
林偉駿又補充:「大家都容忍咗我地上次大折扣無咗，唔會再見689。唔好以為我地而家出爾反爾，真係要適應下，所以如果你話見到有時出返七折，依個我地都仲應付得到。經常六折，真係會翻唔到身」
======================
759減折扣生意跌3成 新特價推到中秋
（資料來源：蘋果日報 11-06-2016）
「唔做折扣少兩成幾，唔係，少三成生意呀！」759阿信屋CEO林偉駿指上月少了做折扣優惠，生意額大跌三成！所以佢早前曾話過唔做折,但今天起，逢星期五、六、日恢復推出返77折，藉以救亡。
林偉駿總括上月的數字，得知一般客人都愛等待優惠出籠，每個客人平均只買三件貨品，到優惠一出，平均「包數」跳升一倍多，有八點二包貨。
日圓係咁升，仲繼續做優惠？林偉駿話已經開始新特價方向，「遲啲唔會全部貨品都有折，佢買得多，會員卡會有紀錄，之後做回贈。」即係會員卡亦都再度復活。不過短期內假日77折都會繼續，至少到中秋節之後，會員制優惠有成效，才會又再考慮取消折扣。
林偉駿又話︰「我落鋪頭睇，街坊都好坦白話唔做折扣，淨係買支水買個杯面，真係唔會買得多。所以要啲客慢慢習慣會少啲店面所有人都有嘅折扣，不過你買得多就會回贈多，都會平咗。大時大節好似中秋、新年都會減多啲依個就唔會變嘅。」