Jul 20, 2016

買二手樓咪上當!化妝樓10大陷阱

(資料來源:蘋果日報 19-07-2016


昔日炒家陳清白坦言:「化妝樓通常都是舊樓,如果層舊樓交吉、全新、無人住,肯定係化妝樓。如果加上之前租咗出去,收番返來,九成都是化妝樓。化妝樓係點?電線無入喉,啲磚就咁撻落去,磚都唔起嘅…你好難睇到!」他不諱言,化妝樓是炒家買回來,用最低成本執到企企理理,賣俾你!

陳清白續稱:「化妝樓通常都是炒家做,業主唔會。炒家平買返來,用最低成本執一執,可以賣貴啲!譬如260萬元買返來,唔執呢,就300萬元,但執完賣得快,仲可能賣330萬元,明明用10萬元裝修,跟住同人講話用咗30萬元,結果賺多20萬元。」


然而化妝技術幾高,都逃唔過資深驗樓師詹濟南嘅法眼。詹sir話,除了驗新盤,咁多年來都驗過唔少化妝樓,最難忘是驗到一個單位,睇到入面有部分體底冷氣機,原來出面無咗部分體機,他透露呢個屋苑位處市區,有返幾十年樓齡,被條行人天橋劏開。唔通暗示美孚新邨?他不回應。越講越多難忘化妝樓,一於踢爆「化妝樓10大陷阱」:

1:油漆遮水迹 以為係牆色

窗邊油到特別深色,近似水迹,完全睇唔出是水迹,還是牆身的顏色,到睇埋窗外,就可以踢爆。

2:電器都有假 嚇到口啞啞

去到個單位,原業主用報紙包住單位入面的分體式冷氣,扮哂新裝,結果打開報紙,係就係有部冷氣係度,但原來無咗出面部分體機,真是「報紙遮電器 賣樓好企理!」

3:用傢俬遮醜 推開見甩漏

浴室牆身滲水,有業主就將個好大嘅櫃遮住個牆身。窗邊漏水,就係窗邊擺張好大嘅梳化,博你擒唔到去睇。

4:假天花封頂 露鐵好鬼驚

見過好硬淨的假天花,揭唔開,原來封死咗。原來是用來遮醜,揭開後,廁所結構出現嚴重問題,天花「露哂鐵」,鋼筋全外露,亦有好多案例,擺個盆接住天花,盆入面有條喉排水,原來是樓上漏水。

5:求其補批盪 扮係全新裝

牆身出現裂紋、剝落,無真正鑿開重鋪,求其用泥水覆蓋就算數。結果一轉天氣,裂紋返來。如果敲一敲,甚至成塊批盪跌落來。

6:睇樓禁開水 水喉弱又脆

睇樓唔俾開水,業主話閂咗總掣。收樓後,原來藏於牆身的暗喉漏水,呢啲要整幾貴,根本上要換哂成屋水喉,要幾萬蚊㗎!

7:水喉早已塞 話無水都得

有啲業主明知單位去水喉塞咗,亦會專登將水掣閂咗!然後藉詞話無交水費,所以無水,結果收樓後,才發現問題。

8:電掣都有假 無駁線真差

單位有電掣係度,但插蘇插落去,無電㗎!唔只一個,係有幾個,全部得個蓋係度,原來入面無駁線。

9:牆紙新簇簇 底層磚已谷

牆身瓷磚剝落,唔少業主用一張全新的牆紙覆蓋,感覺新鮮、好靚、好企理,結果搣少少牆紙,原本鬆脫的瓷磚,全部跌哂出來。

10:地板鬆鬼哂 舖膠扮哂蟹

地板鬆脫「炒起」,用平價籤維板全塊舖落去,睇落地板好平滑,實際當你行到鬆咗個幾塊板上面,係可以聽到空心地皮。又見過廁所門口放塊方塊地氈,踢開見到地板黑鬼哂,是因為滲水搞到發霉