通脹猛於虎，巿民為慳錢出盡法寶。《蘋果》發現大型連鎖超級市場「惠康」，原來於深宵秘賣「筍貨」益街坊，吸引一批師奶到來午夜掃貨。深宵劈價集中在24小時分店，職員會將要清的貨品放進多部手推車，然後隨意放在通道上任揀，價錢比正價平達一半。這些貨品全是無瑕疵的下架貨，有專家大讚促銷手法聰明，開拓夜半購物巿場。
放手推車促銷
「嘩，咁平！」這類驚叫聲，幾乎每晚10點半過後，在將軍澳坑口的24小時惠康此起彼落。收銀機旁的通道聚集不少師奶大叔，做好作戰準備，見職員推着手推車便一擁而上，眾人圍繞六、七部手推車摷來摷去。記者細心觀察，發現裏面放有各式各樣貨品，均貼有黃色特價招紙。一名女士搶先拿起紙包飲品︰「嘩，紙裝飲品9包賣12蚊，咁平」，旁邊顧客附和︰「沐浴露10蚊咁大支，粗用都抵。」
在坑口上班的黃小姐，每晚下班後必定到惠康掃貨，但她只買清貨車的貨品。記者連續幾晚都見到她，有晚買了5元一大包的樂天蛋黃派蛋糕，她直言只買特價貨︰「梗係啦，家咩時勢，仲吼貴價嘢買咩？」她說最愛掃日用品，好像牙膏、牙刷和柔順劑，「平一半以上，慳埋慳埋唔少，一份糧邊度夠！又唔係過期，又唔係唔好食，精明消費者嘛！」
情侶羅先生及李小姐也是常客，「今晚買咗旺旺仙貝經濟裝，咁大包先12蚊，真係好抵！」李小姐說最近才發現清貨車「晝伏夜出」，故只會在晚上11時後出動到超市掃貨。
除了坑口店，觀塘宜安街和元朗教育路的24小時惠康，同樣設有「深宵清貨手推車」。不過，有不少貨品竟同時出現在貨架上，但價錢卻差天共地。好像元朗分店，清貨車上10元一包的台灣雜豆，在貨架卻以正價22.9元發售。記者欲把兩包雜豆放在一起拍照時，被職員發現，即時撕走10元的特價黃色招紙，並將貨品放回貨架上以原價出售。
記者調查後，發現多間惠康有接近二十樣貨品，出現「一物二價」，包括沐浴露、洗手液和咖啡。「好似呢6卷廚房紙巾，如果你喺貨架攞，畀錢時收銀會用barcode過機，收你24.9元。但如果你喺車仔攞，佢上面貼咗張特價13元黃色招紙，收銀就會用人手入數，價錢差一截！」一名熟客向記者教路。
職員認半偷雞
職員表示︰「啲貨太多，我哋打唔切(貼招紙)，同埋唔可以擺太多特價貨喺通道賣，要清咗一批，先會再推埋其他出去賣！」職員承認半夜擺清貨車屬「半偷雞」形式：「日頭驚老細巡舖唔擺得，我哋通常10點後擺，天光前要收起晒！」惠康發言人回應，公司有一套完善的存貨管理指引，應用於全線分店，當中包括減價促銷措施，惟推行時間、地點及貨物折扣等，因應個別情況而訂定。
======================
怕老細巡舖天光前售罄
（資料來源：蘋果日報 04-12-2012）
顧客要等至深夜才見到「清貨手推車」，有超巿職員解釋，他們既要承受上級分貨促銷的壓力，又要避免高層巡舖時看見貨物隨處擺放的尷尬，只好選擇在晚上才擺出清貨特價品。「日間人流太多，我哋唔敢將手推車擺喺通道，怕俾人投訴阻塞，老細都唔鍾意。但另一方面，落架貨太多，有啲剩一箱半箱，都唔知點處置，惟有夜晚等人流冇咁多時推出嚟清貨。」
職員說手推車促銷的貨品，主要為下架貨，至於甚麼貨品做特價，以及如何定價，則全由分店夜班經理「打骰」。
其中坑口分店、人稱「貨場大家姐」的魏小姐說︰「有時啲貨存得太大量，我哋就清咁啲貨走，大約五至七折走晒佢，所以批貨其實冇問題！好似抹手紙咁，啲人一搶好快就冇晒。」她說晚上10時半後劈價，天光前已售罄，「唔使宣傳，啲客慣咗，知乜嘢時間嚟買，所以啲貨清得好快。」
======================
細分店清貨架無人問津
（資料來源：蘋果日報 03-12-2012）
除了24小時惠康，部份經營至晚上11時的惠康，也會趕在收舖前，將特價貨品放在手推車促銷。其中位於香港仔華貴邨的惠康超級市場，在晚上八時後便會將清貨手推車放在通道擺賣，最誇張時多達11部，並以U形擺陣，吸引不少顧客「尋寶」。
部份面積較小的分店，因地方所限、通道狹窄，則會在舖內設立清貨架，通常在舖頭的暗角位置，且貨品選擇不多。
像荃灣路德圍分店，清貨架上的特價品無人問津，銷情明顯不及手推車反應熱烈。
至於百佳及華潤萬家超巿，同樣設有清貨架銷售特價品。不過，百佳清貨架上的貨品多帶有瑕疵，好像調景嶺分店，記者發現有即食伊麪、燕麥片和紙包純牛奶等，包裝表面都因被擠壓而有點破爛。
華潤的特價貨則並非「大路」貨品，好像冬菇、黑木耳等，品牌的減價貨也較少。