「你好！我哋係『萬靈』禮品網打嚟。」萬靈禮品網嘅來電，你肯定聽過唔少，但其實佢係乜野嚟？
不少人聽見「萬靈」，即聯想到大型連鎖生活用品店「萬寧」。其實，電話推銷職員所屬的「萬靈禮品網」，自稱是「東南亞禮品美容服務試用平台」，專門監測美容中心服務質素，與品牌「萬寧」無關。
「我哋今次來電係想送部多功能洗面機俾你，你只需幫我哋做評分意見就得啦。」職員來電指要招募「評分大使」，其實係推銷美容服務。合作美容院包括詩琳、水磨坊、水瓶座、DR Reborn及Amour等五間，客人只需要以「試做價」幫襯指定美容院，事後作簡單評分，即可免費取得洗面機一部。
真係咁抵？壹仔預約試做，以99元幫襯尖沙咀一間樓上美容院做面部護理，服務約為1.5小時，手勢、服務及環保皆為一般，完事後美容院職員卻無瘋狂推銷。其後，憑收據及確認短訊，順利領取贈品洗面機及面膜。但所謂的洗面機，包裝簡陋，零件及設計亦甚兒戲，說明書上的英文更是錯漏百出。
以「優惠價」試做美容服務，是否抵玩實見仁見智；但若希望以小搏大，免費獲得能媲美日、韓品牌的洗面機，則定會大失所望。
===========================
拎完禮品網著數 再狂收推銷電話
（資料來源：壹週Plus）
「萬靈禮品網」職員聲稱，公司專門監察大型美容院質素是否達標，客人完成服務後須做評分及意見，有關資料會抽樣上載雜誌及網頁；但查實，「萬靈禮品網」早於2012年年底出現，根據HK Junk Call的統計，系統累積至今已有近7萬人次舉報。
HK Junk Call創辦人胡文翰直言，此類電話由專做「cold call」的電話推銷公司發出，愛用知名度較高的公司為名，例如「萬寧」、「蘋果」等等，務求令客人減低戒心打開話題，如被問及，才會承認自己與該公司無關，「（電話公司）估計跟美容院係兩個獨立個體，但至於母公司、最上層嘅公司有無關連，就不可而知。」
其實，這類推銷雖無欺騙成份，但應邀上美容院做服務，或需面對職員推銷，享用服務時亦需出示身份證，個人資料會被記錄，消費者要留意。
胡文翰亦估計，電話推銷公司會統計資料，如曾應邀試做facial，之後收到同類電話的機會即大增，根據壹仔測試，試做facial後一星期，已頻頻收到同類電話，故若貪一時之快攞著數，最後分分鐘變搵自己笨。