（資料來源：蘋果日報 17-08-2010）
觀塘apm商場今日起至22號，舉辦「apm達人夜書市」，以潮流文化做主題，包括電子書、品味生活、創意藝術、漫畫地帶、電玩特區同人氣精品。
今次夜書市有成30個參展商，有成1200款唔同題材嘅書種。主辦單位每晚9點後仲會有個開催時段，會揀10本推介書籍以割引價出售，最低去到一折，而且仲有過萬張書券送出。
睇書之餘，夜書市今年第一次同出版商合作，以「城市潮流文化」為主題，接受年輕人提交作品，入圍嘅作品稍後有機會結集成書出版。
大家去夜書市娛樂消費之餘，仲可以乘機做埋善事。受泥石流冲擊嘅甘肅舟曲縣災情嚴重，夜書市內會有一個「輸愛慈善大行動」，收集救災捐款同義賣文具同書籍，現場仲會呼籲及收集市民捐出嘅心靈健康同勵志書籍，稍後會轉送畀災區嘅災民，支持佢哋度過難關。