每年八大資助院校有約一萬五千名學士畢業生，為數不少會選擇投入勞動市場，加上私立大學、海外大學、副學士、高級文慿......六、七月的勞動市場不缺就業機會，但處處充滿競爭。苦讀十數載終得一紙證書，對於初入職場的「新豬肉」來說，或是一張面試機會的入場券，但絕不保證成功獲聘。
面對你不愛，卻總是找上你的「競爭」，你，有信心突圍而出嗎？
今日為大家嚴選六條最難答面試問題，並找來獵頭公司老闆，人稱Son姐的張慧敏為你逐一拆解，不用付款上堂，助你輕鬆成為Interview之皇！
1. 請你介紹一下自己。
Son姐:面試官叫你介紹一吓自己，其實係想聽吓你嘅表達能力，同埋睇吓你係咪有備而來。好似見工做記者咁，你可以講講你家庭同背景點令你對新聞行業有興趣。
2. 點解唔請啲有經驗嘅，要請你？
Son姐:你可以話，你呢份工係需要有人返工、有熱誠、肯拼搏、肯努力，呢啲條件我都有，只係差經驗，如果你肯畀機會我，就可以累積。
3. 畢咗業幾個月都未搵到嘢做嘅？
Son姐:可以照直講，之前冇經驗，用咗幾個月時間，試唔同工種，今次揀呢份工係有備而來。
4. 你期希望的薪金是多少？為何你值此薪金？
Son姐:你講得嗰個價錢，你要問自己點解具備嗰個條件，如果係我，我就會答佢，你請咗我就知。其實大學生有著數，因為大學嘅就業指數處會畀晒薪酬指標你，雖然我自己唔信嗰啲指標。第二，譬如話萬四蚊，你可以話有呢個價先維持到支出同埋在學期間貸款。再者，你可以補充，話嗰個只係期希望待遇，更加想得到嘅係一個機會。
5. 你有咩缺點？
Son姐:你可以講一個配合嗰份工嘅缺點，好似見會計工作，係人都知會計工作時間耐又刻板，你可以話自己性格較枯燥，可以成日對住本書或者電腦都唔駛同人講嘢。唔係叫你哋講大話，如果你係一個坐唔定嘅人，去見份會計工會有前途咩？現時好多求職者玩角色扮演，以為演技好就可以呃到份工。即使呃到份工你都會日日憎自己，點解呢份咁折墮嘅工我都仲要做。
6. 你有咩問題問我哋？
Son姐:求職者要戒嗰種「問咩問題會顯得我醒啲」嘅想法。Interview時，總有啲嘢係你唔明嘅，好似對行業認知，你唔應該「挖」啲嘢嚟問。 應該專注係Interview過程，有咩唔明白、混淆嘅地方，請教對方。
Son姐最後寄語求職新鮮人，搵工不應漁翁撒網，否則失敗次數太多亦會打擊自信。以畢業生為例，想想自己的興趣在哪，選數間公司寄履歷，想想為何自己值得獲聘，加上面試時態度誠懇有禮，獲聘機會較高。
當然，面試題目沒有Model Answer，以上列出的亦只作參考，面試時死記硬背答案而不考慮個人條件及自身因素，只會落得「取消資格」的下場。